Lès djoûnès fîyes, drola, d'in subichun't dès droles, d'ène sézo à l'aûte ! 
    Dins 'l mwès d'mai, èles èrvènun't toudi à twès du salut, sèréyes yeune dèlé l'aûte.  Mès quand èles passun't pau bos, twès fieus soûrtun'nt dè drî lès ârbes, i d'apichun't⁽¹⁾ yeune, èt lès deûs aûtes pèrdun't leû cu à pougnéye djusk'à leûs mésos.  Yun pèrdeut 'l rascoudue⁽²⁾ pa-dzou lès spales, in aûte, pa lès tchvèles⁽³⁾, èyèt durant qu'is 'l balançun't pa twès coûps, 'l twèzième passeut pa-dzou èyèt 'l poûsseut in l'ér. 
    El djoû d'après, èle asteut 'l riséye du vilâdje, èyèt min.me dès deûs qui l'avun't èscapé. . . mès qui 'n pièrdun't rén à ratinde. I d'a yun, après, qu'asteut co d'pus èl' riséye dè tèrtous : l'ome qui passeut d'lé 'l lavwère viyeut bén rète toutes lès couméres talintoûr dè li, èt quand yeune l'aveut apissî pa-dzou lès spales, in aûte li pèrdeut lès djambes, èyèt hop, à 'l balançwère pou 'l pèséye pa 'n twèzième ! 
    Dins lès djoûs qui chûvun't, i n'sondjeut pu qu'à 's mète dins n-in trau 'd fouyon⁽⁴⁾ pou scaper à 'l riséye. 

    Èl 26 da décembe, ène binde dè fieus vont rinde visite à lès djoûnès fîyes qu'is-o fé danser à 'l fièsse dè d'vant.  Yun d'yeûs' s'avance, èyèt done sakans coûps 'd baguète su lès djambes d'èl fîye. . . què v là toute binéche, pinsez bén, èt qui done dès nojètes⁽⁵⁾ ou bén dès gâyes⁽⁶⁾ à toute èl binde.  Quand lès gârçons passun't woute d'ène mézo, c'èst qu'i l-aveut 'n sakè à dîre d'èl fiye, qui 'd vèneut bén mwéche⁽⁷⁾, pusqu'o daleut 'l moustrer du dwèt... èt qu'pou ça, i n'aveut pon dè rvintche. 

À l'eûre d'audjoûrdû, èles fèyen't come ça leû dit, pusquè lès djoûnès z-omes ont lyî leû place à 'l z-èfants : c'èst yeûs', asteûr, qui vont d'in uche à l'aute in d'zant : "Djè v'nans quîre not' fouettadje" pou avwè dès nojètes; ç'qui 'm done à chcrîre ç'què dj'a 'd traviè dins 'l gozète⁽⁸⁾ : qu'is 'm font tchîre aveu leû Alowîne⁽⁹⁾, adon qu'nos avun't ça, droci, bén d'vant l' z-Amèrikins, èyèt qu'lès bètrâles èn' coustun't rén pou fé nos grigne-dints⁽¹⁰⁾ qu'nos dalun't mète dins 'l nûte dèvant lès fèrnièsses aveu 'n tchandèle dèdins !